... या क्रूरतेच्या मुळाशी परवलीचा शब्द आहे, उपयुक्तता. जो आजच्या काळाला त्वचेसारखा घट्ट चिकटलेला आहे. ज्याचा काहीच फायदा नाही ते अस्तित्वात असण्याची काही गरज नाही, ही भूमिका 'यूज अ‍ॅण्ड थ्रो' थिअरी मानणाऱ्यांना पटणारीच आहे. ती मांडण्यासाठी वेगवेगळे आधार घेतले जातात. जसं गुजरात सरकार धर्माचा आधार घेतंय. गाय ही हिंदूंसाठी पूज्य. तेव्हा तिच्या पोटी जन्म घेणाऱ्या बैलाला खाटिकखान्यात पाठवणं हिंदू मनाला कसं पटेल? त्यापेक्षा त्याला जन्मालाच येऊ द्यायचं नाही. पोटी मुलगा जन्माला आला तरच स्वर्ग मिळेल, मुलगी आली तर नाही, हा बागुलबुवाही धर्मशास्त्रानेच दाखवला ना?
भुवनरत्न महाराज म्हणतात, बैलांचा शेतीसाठी उपयोग होतो. त्यांच्या शेणाचा खतासाठी वापर होतो. ते बैलाची उपयुक्तता सांगतात, पण सरकारच्या नैतिकतेला प्रश्न करत नाहीत. स्त्री भ्रूण हत्येला विरोध करणारे म्हणतात, आता मुलीही पुढे गेल्या आहेत. त्या इंदिरा गांधी होतील, किरण बेदी होतील, मेधा पाटकर होतील. आपल्या आईबापाचं नाव मोठं करतील. घराण्याचं नाव उज्ज्वल करतील.
प्रश्न असा आहे की, इंदिरा गांधी वा किरण बेदी न होताही सर्वसामान्य मुलगी म्हणून जन्माला येण्याचा आणि जगण्याचा मुलीला अधिकार आहे की नाही? कुणासाठीही उपयुक्त न ठरता केवळ जगण्याचा मुक्या जनावराला हक्क आहे की नाही?
- जयंत पवार
http://maharashtratimes.indiatimes.com/articleshow/5928677.cms
(महाराष्ट्र टाईम्स - १४ मे - दखल)